İran təhlükəsizlik qüvvələri yaxın məsafədən atəş açaraq 17 yaşlı
gənci öldürüb. Məlumatı BBC-nin farsdilli xidməti mənbələrə
əsaslanaraq yayıb.
17 yaşlı Əbülfəzl Adinezadə oktyabrın 8-də hökumət əleyhinə etiraz
aksiyasında iştirak etmək üçün məktəbdən yayınıb. Oğlan evə
qayıtmayıb.
Səlahiyyətlilər faktı şərh etməyiblər, lakin BBC Adinezadənin ölüm
şəhadətnaməsini əldə edib və orada yeniyetmənin güllənin
zərbəsindən qaraciyər və böyrəyini zədələdiyi bildirilir.
Mənbələr həkimə istinadən Əbülfəzl Adinezadənin 1 metrdən də az
məsafədən güllələndiyini bildirib.
“O, hansı cinayəti törədib ki, 24 güllə ilə onun
qarnından vurublar? — oğlanın dəfnində çəkilmiş videoda mərhum
yeniyetmənin atasının dediyi eşidilir.
Oğlunun aksiyada iştirakından sonra valideynlər əvvəlcə onun başına
nə gəldiyindən xəbərsiz olublar.
Bu, ertəsi günə qədər davam edib, Təhsil Nazirliyindən zəng vurub
bildiriblər ki, oğlu rayon polis şöbəsinə aparılıb. Lakin həmin
yerə çatandan sonra valideynlərə Əbülfəzlinin öldüyü
bildirilib.
“Ağzını bağla və media ilə danışma” — mənbələrə görə,
polis bölməsində oğlanın atasına belə xəbərdarlıq edilib.
Onların məlumatına görə, Əbülfəzlinin etirazçılar tərəfindən
öldürüldüyü görüntüsü yaratmaq üçün mərhum yeniyetmənin ailəsinə
təzyiqlər edilərək, oğlunun hökumətyönlü “Bəsic” silahlı
təşkilatının üzvü olduğunu söyləməyə çağırılıb.
Hökumət dəfələrlə bildirib ki, İranın düşmənlərinə bağlı olan
“üsyançılar” təhlükəsizlik qüvvələrinin digər nümayəndələrini
öldürürlər.
BBC-nin mənbələrə istinadən yazdığına görə, Əbülfəzlinin dəfnində
qəzəbini bildirmək istəyən yas tutanları susdurmaq üçün mülki
geyimdə olan təhlükəsizlik qüvvələri də iştirak edib. Dəfn
mərasimindən sonra bəzi yas tutanları yolda saxlayıb və mobil
telefonlarından videoları silmələrini istəyiblər.
"Mənbələrə görə, o, başqalarını güldürməyi sevən şən
yeniyetmə idi", - deyə BBC jurnalisti Pahram Qobadi
yazıb.
Əbülfəzli dərsdən sonra axşam saat 22:00-a qədər mobil telefon
təmiri müəssisəsində işləyib.
Son vaxtlar yeniyetmə İrandakı korrupsiyaya və sentyabrda əxlaq
polisi tərəfindən “nalayiq geyinmə” ittihamı ilə həbs edilən Məhsa
Əminin ölümü, eləcə də digər qadınların döyülməsi və qətlə
yetirilməsinə görə çox əsəb keçirirmiş.
1 aydan artıqdır ki, İranda hökumət əleyhinə etirazlar davam edir
və bu, son illərdə İslam Respublikası rəhbərliyinə qarşı ən ciddi
çağırışa çevrilib.
Onlarla şəhər və qəsəbələrdə nümayişlər keçirilir və bunlar Əxlaq
Polisi tərəfindən həbs edilən 22 yaşlı Məhsa Əmin adlı qadının
ölümündən sonra başlayıb. O, sentyabr ayında məcburi hicab və digər
geyimlərlə bağlı qanunu pozmaqda ittiham edilərək saxlanılıb.
Hüquq müdafiəçilərinin sözlərinə görə, 22 yaşlı qadın polis
tərəfindən döyülməsi nəticəsində dünyasını dəyişib və İran hökuməti
hadisəyə səbəb kimi qadının səhhətinin pisləşməsini göstərib.
İran İnsan Haqları Fəalları Xəbər Agentliyi (HRANA) xəbər verir ki,
etirazlar zamanı təhlükəsizlik qüvvələri tərəfindən 32-si uşaq
olmaqla 244 nümayişçi öldürülüb. Agentliyin məlumatına görə, 12500
nəfər həbs edilib ki, onların da əksəriyyəti gənclər və
uşaqlardır.
Farsdilli və digər KİV-lər dəfələrlə hökumətin öldürülən
nümayişçilərin ailələrini qorxutması və şantaj etməsi barədə
yazıblar.