Marneuli yerli özünüidarəsi Nərimanov küçəsi 1 ünvanında yerləşən
çoxmənzilli yaşayış binasının bərpası üçün 2023-cü ilin büdcəsindən
1 715 500 lari ayırıb.
Marneulinin 2023-cü il büdcəsinin qəzalı vəziyyətdə olan bina və
evlərin bərpası proqramına əsasən, proqram çərçivəsində bələdiyyə
ərazisində qəzalı vəziyyətdə olan binaların araşdırılması,
gözlənilən təhlükələrin qarşısının alınması məqsədi ilə
ekspertizanın aparılması həyata keçiriləcək. Proqram həmçinin,
büdcə imkanları
çərçivəsində qəzalı vəziyyətdə olan binaların
bərpasını da nəzərdə tutur. Məhz qeyd olunan proqram üçün büdcədən
1 715 500 lari ayrılıb.
Qeyd etmək lazımdır ki, Marneulinin 2022-ci il büdcəsində “qəzalı
vəziyyətdə olan bina və evlərin bərpası üçün” proqram nəzərdə
tutulmamışdı. Bu gün, 24 yanvar tarixində Marneuli meriyasının
Maliyyə-Büdcə Xidmətinin rəhbəri Maia Naveriani “Marneuli”
radiosuna bildirdi ki, proqramın əlavə edilməsi Nərimanov küçəsində
yerləşən yaşayış korpusunun bərpasına görə lazım olub.
Yeddi aydır ki, Marneulidə, Nərimanov küçəsi 1 ünvanında yerləşən
yaşayış binasının iki eyvanı uçub. Hadisə nəticəsində iki qadın
həyatını itirmişdi. Beşinci mərtəbənin eyvanı 26 iyun tarixində
uçmuşdu və bu dördüncü mərtəbənin eyvanının da uçmasına səbəb
olmuşdu. Hadisədən sonra Marneuli meriyası vətəndaşları
mehmanxanaya yerləşdirmişdi. Eyvanı uçmuş binanın vəziyyətini Levan
Samxarauli adına Milli Məhkəmə Ekspertiza Bürosu araşdırmışdı.
Onların nəticəsinə görə, binada bərkitmə-gücləndirmə işlərinə
ehtiyac var. Buna baxmayaraq, binanın sakinləri yenidən öz evlərinə
qayıtdılar. Özünüidarə 2022-ci ilin 18 noyabr tarixində binanın
bərpası üçün 2 121 737 lari dəyərində tender elan etsə də, tenderdə
heç bir şirkət iştirak etmədiyindən tender baş tutmamışdı.