Marneuli bələdiyyəsinin yerli özünüidarəsi iki parkın tikintisi işləri üçün tender elan edib. Marneuli meriyası Marneuli şəhərinin Candar məntəqəsində, çinar ərazisində və Beytarabçı kəndində park salmağı planlaşdırır.

“İndiki vəziyyətdə nə layihə nəzərdə tutulan ərazidə, nə də onun yaxınlığında heç bir istirahət məkanı yoxdur. Bu isə əhalinin, xüsusilə də yeniyetmələrin idman-sağlamlıq aktivliklərinə qoşulmasına mane olur. Əhalinin və sifarişçinin

tələbi ilə park salınır, məşq üçün trenajorlar qurulacaq.

Təhlükəsizlik məqsədi ilə layihə nəzərdə tutualn park panel hasarla hasarlanacaq, plitələrin düzüldüyü, beton bordyurlarla haşiyələnmiş cığırlar salınacaq. Stullar və zibil qabları yerləşdiriləcək.

Park ərazisində qapalı trenajor məkanı yaradılacaq. Müvafqi trenajorlar və uşaqların əyləncəsi üçün atraksionlar qurulacaq.

Park ərazisində işıqlandırma üçün lampalar qurulacaq ki, parkdan gecə saatlarında da yararlana bilsinlər. Park yaxınlıqda yerləşən elektrik dirəyindən elektrik enerjisi ilə təmin ediləcək”, – parkın tikilməsi layihəsində qeyd olunub.

Marneuli bələdiyyəsinin yerli özünüidarəsi Candarda, çinar ərazisində və Marneuli bələdiyyəsinin Beytarabçı kəndində parkın tikinti işləri üçün 177 069 lari xərcləyəcək.

Tenderdə iştirak etmək istəyən şirkətlər 20 dekabr tarixindən 25 dekabr tarixinə qədər öz təkliflərini göndərə bilərlər. Tenderə görə, qalib şirkət müqavilə bağlandıqdan 90 iş günü ərzində meriyaya işləri təhvil verməlidir.