Gürcüstanda insan hüquqları və azadlığın
müdafiəsi vəziyyəti ilə bağlı 2018-ci ilin hesabatına görə, məktəb
təhsilinin milli azlıqlar əlçatanlığı baxımından ötən illərdə
mövcud olan problemlər yenə də aktualdır.
Gürcüstanda milli azlıqların dilində (azərbaycan, erməni, rus)
təhsil 290 ictimai məktəb və sektorda davam edir. Gürcüstan
miqyasında müxtəlif fənlər üzrə azərbaycandilli müəllimlərin sayı 3
411 nəfərdir. Azərbaycandilli məktəb və sektorlarda təhsil alan
şagirdlərin sayı isə 25 018 nəfərdir.
Hesabata görə, çox dilli, iki dilli tədris metodunun tətbiq
olunduğu məktəblərdə çox dilli müəllimlər və dərsliklər məsələsi
yenə də problem olaraq qalmaqdadır.
“Məktəblərdə ana dili və ədəbiyyatın
(azərbaycan/erməni/rus) qrifsiz dərsliklərlə tədrisi məsələsi
problem olaraq qalmaqdadır. Təhsil, Elm, Mədəniyyət və İdman
Nazirliyinin məlumatına görə, bu problemin aradan qaldırılması üçün
elan olunmuş müsabiqəyə heç bir ərizə daxil olmayıb.”
– Xalq müdafiəçisinin hesabatında qeyd edilib.
Gürcüstan Təhsil, Elm, Mədəniyyət və İdman Nazirliyinin məlumatına
görə, azərbaycandilli məktəblərdə 539 gürcü dili müəllimi fəaliyyət
göstərir. Xalq müdafiəçisinin hesabatına görə, milli azlıqların
yaşadığı bölgələrdəki məktəblərdə gürcü dili müəllimlərinin bir
hissəsi gürcü dilini ünsiyyət səviyyəsində belə bilmir.
Müəllimlərin Peşəkarlığının İnkişafı Mərkəzi tərəfindən bölgələrə
ezam olunmuş gürcü dili müəllimlərinin sayı isə məktəb tədrisi
çərçivəsində dövlət dili probleminin tam həlli üçün kifayət
deyil.