ბოლო ორი დღის განმავლობაში დმანისში განვითარებული მოვლენები კარგად წარმოაჩენს სახელწიფოს უსუსურობას, მრავალწლიანი გამრიყავი პოლიტიკის, გამაუცხოებელი რიტორიკის, საზოგადოების სხვადასხვა ჯგუფს შორის კედლების მშენებლობის, პრივილეგირებულ და ნაკლებად პრივილეგირებულ მოქალაქეებად დაყოფის, ძალადობის წახალისების, კრიმინალთან კოჰაბიტაციის, სიძულვილის ენის, დაუსჯელობის და უსამართლობის უმძიმეს სოციალურ შედეგს.
დმანისში საქართველოს მოქალაქეთა ორ ჯგუფს შორის დაპირისპირება უმართავ პროცესში გადაიზარდა, რის შედეგადაც რამდენიმე პირი დაზარალდა. ხელისუფლებამ მთელი პროცესის განმავლობაში გამოავლინა სრული არაკომპეტენტურობა და ვერ უზრუნველყო პოზიტიური როლის შესრულება სტაბილურობის შესანარჩუნებლად.

ხელისუფლება ცდილობს დაპირისპირების ზედაპირულ შეფასებას, თავს არიდებს პრობლემის რეალური მიზეზების ძიებას და აღიარებას, რომელზეც უნდა დაფუძნდეს დაპირისპირების შემდგომი პრევენცია და შერიგებისა და ნდობის აღდგენის პროცესი.

დმანისის მოვლენამ აჩვენა სახელმწიფოს ფასადური ინტეგრაციის პოლიტიკის წარუმატებლობა, რომელმაც ვერ უზუნველყო მოქალაქეთა შორის სამართლიანი, თანასწორი, სტაბილური, ინკლუზიური და დემოკრატიული გარემოს შექმნა.

ეთნიკური და რელიგიური უმცირესობების მიმართ წარმოებული მრავალწლიანი პოლიტიკა, უცხო ქვეყნებზე საკუთარი მოქალაქეების მიბმა და უსაფრთხოების ჭრილში დანახვა ხელს უწყობს საზოგადოებაში გაუცხოებისა და გარიყულობის პრაქტიკის გაძლიერებას. შინაგან საქმეთა მინისტრის განცხადება, რომელიც გულისხმობდა აზერბაიჯანულენოვანი თანამოქალქეების აზერბაიჯანის სახელმწიფოსთან სტრატეგიული პარტნიორობის ჭრილში დანახვას, მკაფიოდ წარმოაჩენს ხელისუფლების რეალურ დამოკიდებულებას საქართველოს არადომინანტი ჯგუფების მიმართ.

სოლიდარობის პლატფორმა სახელმწიფოს მოუწოდებს:

1. უზუნველყოს რეალური სტაბილურობისა და მშვიდობის შექმნა დმანისში;
2. იმოქმედოს სამართლებრივი სახელმწიფოს პრინციპით, უსამართლობის გრძნობის აღმოსაფხვრელად და კრიმინალის წახალისების საწინააღმდეგოდ, პასუხი აგებინოს დაპირისპირების პროვოცირებაში ჩართულ ყველა დამნაშავეს, მიუკერძიებელი გამოძიების უზრუნველყოფით.
3. შესაბამისი უწყებების ჩართულობით და დაპირისპირების რეალური მიზეზების აღიარებით, დაიწყოს კონფლიქტის მიზეზების გააზრება და მისი ტრანსფორმაცია, მშვიდობისა და ნდობის აღდგენის პროცესი ადგილობრივ მოსახლეობაში.
4. უარი თქვას საკუთარი მოქალაქეების უცხოებად მონიშვნასა და მეორე სახელმწიფოსთან დაკავშირებაზე, მათთან საუბრისას შეცვალოს უსაფრხოებაზე დაფუძნებული რიტორიკა.
5. შეიმუშავოს ქმედითი, რეალურ შედეგებზე ორიენტირებული ინტეგრაციის პოლიტიკა და შერიგებისა და თანასწორობის სამინისტროს რეალური მანდატის განხორციელებით შეძლოს მისი იმპლემენტაცია.
სოლიდარობის პლატფორმა აერთიანებს აქტივისტებს სხვადასხვა რეგიონიდან, მათ შორის, აჭარიდან, სამცხე-ჯავახეთიდან, ქვემო ქართლიდან, პანკისიდან, თბილისიდან და მისი მიზანია არადომინანტურ ეთნიკურ და რელიგიურ ჯგუფებს შორის სოლიდარობის შენება და მათი საჭიროებების, წუხილებისა და ხედვების პოლიტიკურ დღის წესრიგში დაყენება.